UBS, 2 miliardë franga fitim në tremujor

Banka më e madhe e Zvicrës, UBS brenda tre muajve të fundit ose në kuartalin e parë të këtij viti pothuaj ka dyfishuar fitimin e saj në krahasim me tremujorin e parë të vitit të kaluar. Ajo ka regjistruar një fitim prej 1.97 miliard frangash.

Shumë sektorë pune të kësaj banke kanë funksionuar gjatë këtij tremujori po aq mirë sikur para krizës së madhe financiare botërore të vitit 2008, njofton UBS.
Fitimit të madh i kanë kontribuuar edhe sektori investment banking dhe ai i menaxhimit të pasurive.

Klientët gjatë kësaj periudhe kanë sjellë në bankën UBS 19 miliardë franga të reja (për herë të parë), të holla këto të cilat tashti janë në menaxhimin e bankës.
Me fitimin prej afër 2 miliardë frangash brenda një tremujori, USB ka tejkaluar parashikimet e analistëve.