U kualifikua e para në Eurovision, si kënga më e votuar me mbështetjen e diasporës dhe kosovarëve

Paraqitja fantastike e Albina Kelmendit la gojëhapur të gjitha shtetet konkurruese në Eurovision për radhitjen e saj në krye të listës.

Çfarë interpretimi i mrekullueshëm nga Albina dhe Familja Kelmendi, ishin kryesisht komentet e përfaqësuesve të shteteve të tjera, shkruan albinfo.ch.

Mirëpo, mbështetja e madhe e këngës “Duaje” ishte një habi për të gjitha shtetet konkurruese, me radhitjen e saj si e para më e votuara në listën e këngëve në Eurovision.

Vëmendja kthehet se këtë vit, për herë të parë, këngët konkurruese për finalen e madhe të Eurovisionit u bënë vetëm me vota të publikut, duke anuluar votat e jurisë.

Albina Kelmendi, këngëtare e shquar nga Kosova, këtë vit fitoi garën në edicionin e festivalit shqip, për të përfaqësuar Shqipërinë me këngën “Duaje”.

Shumë ekspertë të muzikës në Shqipëri ishin skeptikë për këngën “Duaje”, duke e cilësuar si këngë që do të ngelë në fund të listës së Evrovisionit.

Si duket ndodhi e kundërta, Albina Kelmendi ka marrë mbështetje të madhe nga diaspora shqiptare dhe nga e gjithë Kosova. Votat e shumta të dërguara për Albinën e bënë të kualifikohet e para në finalen e Eurovisionit, shkruan tutje albinfo.ch.

Albina është shprehur mjaft e emocionuar dhe krenare për këtë arritje, në konferencën e mbajtur fill pas përfundimit të natës së dytë të gjysmëfinales.

Pyetur nga gazetarët e pranishëm se si është të ndash suksesin së bashku me familjen e saj, Albina u shpreh se është një ndjesi unike dhe e papërshkrueshme.

“E kam zemrën plot! Emocione unike e shumë të mëdha! E dija, ju kam ndierë që jeni me mua që nga dhjetori e deri më sot. Kam besuar që bashkë do t’ia dilnim, e ja ku jemi! Bashkë drejt finales, me ju të shtunën plot krenari e sukses! Ju dua”, ka shkruar Albina.

Ndërkohë shtetet e tjera që mbrëmë arritën të kualifikohen për finale janë: Qipro, Estonia, Belgjika, Austria, Lituania, Polonia, Australia, Armenia dhe Sllovenia. /Albinfo.ch

 

 

 

---