Tragjedia në Vjenë, Komuniteti Shqiptar Musliman në Austri shpreh dhimbje dhe solidaritet

Ngjarja e rëndë në Vjenë, reagim nga ALKIG - Albanische Kultusgemeinde

ALKIG – Albanische Kultusgemeinde ka reaguar me pikëllim të thellë pas aksidentit tragjik që ndodhi në Vjenë, ku si pasojë e shembjes së një strukture gjatë punimeve humbën jetën katër persona, ndërsa një tjetër mbeti i lënduar, transmeton albinfo.at.

Në reagimin e tyre zyrtar, Komuniteti Shqiptar Musliman në Austri u ka shprehur ngushëllimet më të sinqerta familjeve të viktimave, të afërmve dhe gjithë bashkëkombësve të prekur nga kjo ngjarje e rëndë.

“Lusim Allahun e Madhëruar që viktimat t’i mëshirojë dhe t’i shpërblejë me Xhenet, ndërsa familjarëve t’u japë sabër dhe forcë për ta përballuar këtë dhimbje të madhe”, thuhet në reagim.

Po ashtu, ALKIG – Albanische Kultusgemeinde ka bërë të ditur se qëndron pranë familjeve të prekura, duke ofruar mbështetje në aspektin fetar dhe njerëzor për çdo nevojë që mund të paraqitet në këto momente të vështira.

Në fund të reagimit, është shprehur lutja që viktimat të mëshirohen, të lënduarit të shërohen dhe punëtorët të jenë të mbrojtur kudo që ndodhen./Albinfo.at

---