Thaçi dhe Haradinaj reagojnë për ndalimin e karateistëve të Kosovës

Presidenti i Kosovës, Hashim Thaçi e ka konsideruar të papranueshme ndalesën e pjesëmarrjes së karateistëve kosovarë në Kampionatin Evropian të Karatesë për seniorë që mbahet në Novi-Sad.

“Ndalimi i pjesëmarrjes së karateisteve kosovarë në Kampionatin Evropian të karatesë për seniorë në Novi-Sad nga autoritetet e Beogradit është e papranueshme, është kundër frymës sportive dhe rregullave elementare të Federatës Ndërkombëtare të Karatesë”, ka shkruar Thaçi në llogarinë e tij personale në “Facebook”, përcjell albinfo.ch.

“Me sjellje të tilla, Serbia po tenton t’i politizojë edhe sportin, i cili duhet t’i bashkojë popujt dhe jo të krijojë ndarje mes tyre”.

Në lidhje me ndalimin e karateistëve të Kosovës në kufi nga autoritetet serbe ka reaguar edhe kryeministri i Kosovës, Ramush Haradinaj.
“Është akt i papranueshëm që nuk i kontribuon normalizimit të marrëdhënieve ndërmjet dy shteteve tona. Autoritetet serbe janë njoftuar më kohë nga Komiteti Olimpik i Kosovës për këtë udhëtim dhe pretendimi se ato nuk janë informuar me kohë është i paqëndrueshëm”, ka shkruar Haradinaj në reagimin e tij.

Kryeministri ka thënë se ndalesa e dytë e shtetit serb është veprim që sinjalizon se Serbia po qëndron në politikat nacionaliste të konfliktit dhe refuzimit.