Tesla nuk është më shitësi më i madh i veturave elektrike

Pozicionit të Tesla-s si kompania me më shumë shitje në tregun e automjeteve elektrike po i vjen fundi.

Kjo, sipas shifrave të shitjeve të publikuara këtë javë nga prodhuesi kinez i automobilave BYD i mbështetur nga Warren Buffett

BYD zbuloi se shiti 641 mijë 350 automjete elektrike në gjashtë muajt e parë të vitit 2022, sipas një depozitimi të kompanisë.

Kjo shifër e shitjeve shënoi një rritje prej rreth 314% krahasuar me të njëjtën periudhë të një viti më parë.

Sipas njoftimit, BYD shiti më shumë se 134 mijë automjete vetëm në qershor.

Për krahasim, Tesla e Elon Musk shiti 564, mijë e 743 automjete gjatë gjysmës së parë të vitit 2022 – një periudhë e trazuar në të cilën kompania u përpoq të kapërcejë një mbyllje të gjatë në një fabrikë kryesore të prodhimit në Shangai dhe ndërprerje të tjera të lidhura me zinxhirin e furnizimit.

Konglomerati i Buffett “Berkshire Hathaway” mbante 7.7% të aksioneve në BYD që nga prilli, me vlerë më shumë se 9 miliardë dollarë. Kompania shpenzoi 232 milionë dollarë për të blerë aksionet e saj fillestare në firmën kineze në 2008.

Musk tha në maj se ai priste që disa “kompani shumë të forta” të dilnin nga Kina dhe të siguronin konkurrencë të fortë për Teslën në sektorin e automjeteve elektrike në vitet në vijim.

Megjithatë, shefi i Tesla-s dhe njeriu më i pasur në botë ishte shpërfillës në një intervistë të vitit 2011 kur u pyet për produktin e BYD.

“A e keni parë makinën e tyre? Unë nuk mendoj se ata kanë një produkt të shkëlqyeshëm. Nuk mendoj se është tërheqëse, teknologjia nuk është shumë e fortë”, tha Musk për Bloomberg në atë kohë.

 

---