Të rinjtë gjermanë mendojnë se është e pranueshme dhuna ndaj grave

Sondazhi i ri nga shoqata bamirëse për fëmijë Plan International Germany nxjerr në pah se një e treta e të rinjve në Gjermani e konsiderojnë të pranueshme përdorimin e dhunës ndaj grave.

Një grupi prej 1000 burrash dhe 1000 grash të moshës 18-35 vjeç nga e gjithë Gjermania iu kërkua të jepnin pikëpamjet e tyre mbi maskulinitetin për studimin dhe del se 34% e meshkujve nga ajo grupmoshë pranuan se kanë qenë të dhunshëm ndaj partneres së tyre femër në të kaluarën, shkruan The Local.

33% thanë se mendonin se ishte e pranueshme nëse “dora e tyre rrëshqiste” herë pas here gjatë një debati me partnerin e tyre.

Sondazhi po ashtu zbuloi se 50% e burrave thanë se nuk do të dëshironin një marrëdhënie me një grua që kishte pasur shumë partnerë seksualë, ndërsa 20% e grave të intervistuara ishin dakord me këtë deklaratë.

Po ashtu doli se pritshmëritë brenda një marrëdhënieje ndryshonin shumë midis burrave dhe grave.

Pak më shumë se gjysma e meshkujve – 52% – donin një marrëdhënie në formën e një “modeli të familjes-shtëpiake”, ku ata fitonin pjesën më të madhe të parave për shtëpinë dhe kujdesi për fëmijët dhe detyrat shtëpiake ishin kryesisht roli i gruas, shkrtuan The Local.

Mbi dy të tretat e grave të intervistuara nuk ishin dakord, duke dashur partneritete të barabarta dhe vendimmarrje të përbashkët.

Pak më pak se gjysma e të anketuarve – 48% – shprehën një mospëlqim për shfaqjet publike të homoseksualitetit, duke thënë se ndjeheshin “të shqetësuar” nga kjo.

Sipas të dhënave nga Policia Federale Kriminale e Gjermanisë (BKA), 115,000 gra në Gjermani ishin viktima të dhunës nga partneri në vitin 2021.