Sportistët në diasporë, ambasadorët e Kosovës

Ministri kosovar i Diasporës, Ibrahim Makolli tha se Kosova krenohet me sportistët në diasporë

Republika e Kosovës ndihet krenarë me sportistët e saj që po e shkruanin historinë nëpër vendete ndryshme të botës. Këta sportistë janë shndërruar në ambasadorët më të mitë të Kosovës nëpër botë. Kështu deklaroi ministri kosovar i Diasporës. Ibrahim Makolli.

Këto komente ai i bërë pas një takimi që zhvilloi me boksierin profesionist shqiptar me renome ndërkombëtare, Tefik Bajrami.

Ky i fundit, i cili jeton në Lucern të Zvicrës, ka ardhur në Kosovë për të zhvilluar një meç me hungarezin Peter Hezgies, të cilin e ka mposhtur në një luftë interesant që u zhvillua në Podujevë, në vendlindjen e tij.

Ministri Makolli ia uroi fitoren boksierit Bajrami në meçin që u mbajt para dy ditësh në Podujevë. Ai e përgëzoi boksierin Bajrami për sukseset e vazhdueshme.

“Sukseset e mërgimtarëve tanë në fusha të ndryshme i përjetojmë edhe ne, kudo që ndodhemi, dhe krenohemi me sukseset  tuaja. Sot, sportistët tanë që jetojnë e veprojnë në shtete të ndryshme janë shndërruar në ambasadorët  më të mirë për Kosovën”, theksoi ndër të tjera ministri Makolli.

Ai tha se Kosova është përkushtuar për t’i përkrahur sportistët kosovarë dhe “bashkërisht t’i gjejmë format për ta dhënë ndihmën tonë, në mënyrë që t’i inkurajojmë edhe sportistët e rinj”.

Ndërkohë, boksieri Tefik Bajrami tha se është i gatshëm t’i ndihmojë sportistët e rinj nga Kosova.

Tefik Bajrami të shtunën mbrëma në Podujevë e ka mposhtur hungarezin Peter Hezgies. Fitorja ka ardhur pas 6 raundeve të zhvilluara dhe vendimit unanim të gjyqtarëve. “Jam shumë i emocionuar dhe i lumtur për fitoren, pasi që këtë e kam dashur shumë, për t’u kthyer me fitore në vendlindje”, tha Bajrami pas meçit.

“Peter ishte një kundërshtar i fortë, por vendosi dëshira më e madhe për fitore dhe përgatitja më e mirë fizike”, shtoi ai.

Bajrami e filloi mjaft mirë meçin duke dominuar në dy raundet e para, para se të pësonte një rënie në atë të tretën dhe katërtën. Mirëpo vendimtarë ishte raundi i fundit, kur ai bindshëm ishte më efikas se hungarezi në goditje. Kjo ishte fitrorja e shtatë për Bajramin në ringun profesionist karshi një humbje.

Spektakli i boksit në Podujëve u përcoll nga afro 2 mijë shikues.