Sonte në Cyrih: Dy filma me Arta Dobroshin

Dy filma që do të shfaqen në programin e sontëm janë : "Syri magjik" dhe "Heshtja e Lornës. Në të dytë, luan aktorja e njohur shqiptare nga Kosova, Arta Dobroshi

Siç kemi njoftuar tashmë, Podiumi i filmit i qytetit të Cyrihut (Film Podium der Stadt Zürich) nga 16 shkurti deri më 22 mars është duke shfaqur një cikël filmash shqiptarë, të shoqëruar nga aktivitete të tjera me temën “Shqipëria në film” (“Albanien in film”).

Gjatë kësaj periudhe po shfaqen si filmat shqiptarë nga koha e monizmit ashtu dhe filmat më të rinj nga Shqipëria dhe Kosova, shkruan albinfo.ch. Ky cikël filmash  rrumbullakësohet me shfaqjen e disa filmave nga Evropa Perëndimore që japin një pamje nga jashtë, të Shqipërisë dhe Kosovës.

Në kuadrin e këtij cikli, sot, më 6 mars janë paraparë tre filma. Filmi “Lamerica”, i cili është shfaqur tashmë njëherë pra pak ditësh, është shfaqur edhe sot, me fillim në orën 15.

Ndërsa dy filma të tjerë që do të shfaqen në programin e sontëm janë : “Syri magjik” dhe “Heshtja e Lornës. Në të dytë, luan aktorja e njohur shqiptare nga Kosova, Arta Dobroshi.

Filmi “Syri magjik” (Magic eye) shfaqet në orën 18 e 15 ndërsa i ka edhe dy shfaqje tjera: më 16 dhe më 21 mars, në orën 20.45. Ky është film i Kujtim  Çashkut, me Arta Dobroshin dhe Bujar Lakon në rolet kryesore, shkruan albinfo.ch. Filmi i xhiruar në vitin 2005 temën e merr nga zhvillimet dramatike të viotit 1997 në Shqipëri.

Filmi tjetër, “Heshtja e Lornës” (Le silence de Lorna) është vepër e regjisorit të njohur Jean-Pierre Dardenne, prodhim nga viti 2008. Ky film i ka sjellë famë ndërkombëtare aktores sonë, Arta Dobroshi. Ai bën fjalë për peripecitë e një emigranteje të re nga Shqipëria në Belgjikë.

Sikurse të gjithë filmat edhe ky film që shfaqet sonte në orën 20.45, mund të shikohet në Kino Filmpodium, Nüschelerstrasse 11, 8001 Zürich.

---