Kompania zvicerane për kontrollin e trafikut ajror, Skyguide, ka njoftuar se e ka identifikuar shkakun e problemit teknik dhe se sistemet e prekura tashmë po funksionojnë normalisht.
Më herët, për shkak të këtij problemi, Skyguide kishte ulur kapacitetin e kontrollit të trafikut ajror me 50 për qind. Për një periudhë të shkurtër, ishin pezulluar edhe ngritjet dhe uljet e avionëve në aeroportet e Cyrihut dhe Gjenevës.
Sipas njoftimit të kompanisë, si masë paraprake, kapaciteti do të mbetet i kufizuar në 80 për qind gjatë një periudhe 24-orëshe të stabilizimit. Kjo masë synon të sigurojë funksionimin e qëndrueshëm dhe të besueshëm të sistemeve.
Pas përfundimit të kësaj periudhe, pritet që kapaciteti i trafikut ajror të rikthehet në nivelin e plotë.
Skyguide kishte deklaruar më herët se siguria në hapësirën ajrore zvicerane nuk ishte rrezikuar. Kompania ka shprehur keqardhje për incidentin dhe u ka kërkuar falje partnerëve dhe udhëtarëve të prekur.
