S’ka interesim të specialistëve për punësim në Spitale

Shërbimi Spitalor dhe Klinik Universitar i Kosovës njofton se në konkursin publik për vende të lira pune, për 22 profile të ndryshme mjekësore, ku u kërkuan 28 specialistë, në kuadër të Spitaleve të Përgjithshme, nuk ka pasur interesim të mjaftueshëm, edhe pse ekzistojnë vendet e lira të punës të aprovuara në buxhetin e vitit 2018, transmeton albinfo.ch.

“Sa për ilustrim, në Spitalin e Përgjithshëm të Gjakovës, ishte kërkuar 1 specialist i ORL, por nuk ka pasur të interesuar, po ashtu nuk kishte aplikant për specialist të radiologjisë”, thuhet në njoftim.

Po ashtu në Spitalin e Përgjithshëm të Ferizajt, ishin kërkuar dy kirurgë të përgjithshëm, por nuk ka pasur fare aplikues. SSHKUK-ja njofton se edhe në Spitalin e Mitrovicë në tri pozita nuk ka pasur fare aplikant për punësim si specialist i neurologjisë, ORL-së, dhe për specialistë në repartin e infektives.