Si jetojnë të kthyerit nga Gjermania

40 vjeçari X. nga Kosova në verën e vitit 2013 kishte shkuar në Gjermani, gjegjësisht në Munih për të kërkuar azil. Një vit më vonë familjes i refuzohet qëndrimi. E në dimrin pasues ata detyrohen të kthehen nga kanë ardhur, në Kosovë

Numri më i madh i azilkërkuesve të cilët qyteti i Munihut (Landi i Bavarisë) i ka kthyer  gjatë vitit të kaluar,  janë nga shtetet e Evropës Juglindore, gjegjësisht 584 veta, shkruan Süddeutsche Zeitung.

Nga Azia kanë qenë 65, ndërsa nga Afrika 15 dhe vetëm një nga Amerika Latine.

Gazeta ka ndjekur katër raste të ndryshme të të kthyerve, duke përshkruar gjendjen me të cilën ata janë përballur në vendet e prejardhjes, transmeton albinfo.ch. Njëri prej tyre është rasti i kosovarit që nuk ka dashur t`i përmendet emri, dhe të cilin gazeta e identifikon si “X.”.

40 vjeçari X. nga Kosova së bashku me bashkëshorten dhe dy fëmijët (shtatë dhe 14 vjeç) në verën e vitit 2013 kishte vendosur të shkonte në Gjermani, gjegjësisht në Munih për të kërkuar azil. Një vit më vonë familjes i vjen vendimi negativ, gjegjësisht i refuzohet qëndrimi. E në dimrin pasues ata detyrohen të kthehen nga kanë ardhur, në Kosovë.

Fillimi i ri në vendin e vjetër ishte mjaft i vështirë: para se të shkonte në Gjermani, X. kishte punuar në një autolarje. Por pas kthimit, atij i është dashur të kërkojë sërish punë, përcjell albinfo.ch. Një ndihmesë financiare që i ishte dhënë për fillim nga IOM (Organizata Ndërkombëtare për Migracion) nëpërmjet këshillimores së Munihut për kthim të refugjatëve, ishte shpenzuar shpejt.

Por organizata “Coming Home” nga Munihu i ka financuar familjes kosovare pajisjen me aparate shumë të nevojshme të amvisërisë.