Shtohet numri i turqve që kërkojnë azil në Gjermani

Një numër në rritje i qytetarëve turq të arsimuar që kundërshtojnë qeverinë po shkojnë drejt Gjermanisë.

Shumë janë duke kërkuar azil, por autoritetet gjermane janë më pak të prirura për ta dhënë atë.

“Duke jetuar në frikë dhe pasiguri çdo ditë, duke pritur që policia të kthehet dhe të na rrëmbejë nga shtretërit, të na çojë në stacion dhe të na torturojë… nuk duruam më. Pas vdekjes së babait, vendosëm të largohet nga vendi”, tha B.K., një ish-mësues i anglishtes, i cili nuk deshi të jepte emrin e tij të plotë, shkruan DW.

Pasi të dy u akuzuan si anëtarë të “organizatës Gylen” në Turqi, ata tashmë kanë aplikuar për azil në Gjermani dhe janë në pritje të vendimit të qeverisë.

Sipas Zyrës Federale të Gjermanisë për Migracionin dhe Refugjatët, BAMF, më shumë se 23,000 shtetas turq kanë aplikuar për azil në vend vetëm këtë vit – një rritje prej 203% krahasuar me të njëjtën periudhë të vitit të kaluar.

Në korrik, 3,791 shtetas turq paraqitën aplikime, duke tejkaluar numrin e shtetasve afganë dhe tani të dytët pas shtetasve sirianë, përcjell albinfo.ch.

Ekspertët e Turqisë nuk janë të befasuar. Shumë e kishin parashikuar zhvillimin pasi Presidenti Rexhep Tajip Erdogan fitoi përsëri zgjedhjet presidenciale në maj.

“Të paktën gjysma [e elektoratit] që nuk votoi për Erdoganin është e zhgënjyer”, tha Dündar Kelloglu, një avokat dhe anëtar bordi i Këshillit të Refugjatëve të Saksonisë së Ulët.

Që nga përpjekja për grusht shteti të vitit 2016, qeveria turke ka goditur edhe më fort kritikët. Mijëra anëtarë të opozitës janë burgosur dhe disa mijëra kanë humbur punën pasi dyshohen për terrorizëm.

Situata ekonomike në vend është përkeqësuar me shpejtësi gjatë dy vjetëve të fundit. Politika e normave të ulëta të interesit të presidentit ka çuar në një rënie të monedhës dhe në rritje të inflacionit.

Norma vjetore e inflacionit arriti në 48% muajin e kaluar dhe Banka qendrore pret që ai të jetë rritur në 58% deri në fund të vitit. Një pjesë e madhe e popullsisë po bien në varfëri, shkruan DW.

Gjermania është një destinacion veçanërisht tërheqës për ata që nuk besojnë më se situata do të përmirësohet në Turqi, si dhe për ata që largohen për arsye politike. Tashmë 3 milionë njerëz me origjinë turke jetojnë në vend, duke u siguruar të ardhurve rrjete familjesh dhe miqsh. Shumë turq po imigrojnë gjithashtu nëpërmjet kanaleve të parregullta.

Në vitin 2021, 7067 shtetas turq kërkuan azil në Gjermani. Një vit më vonë, numri i aplikimeve ishte trefishuar, duke arritur në 23,938. Këtë vit, shifra prej 23,000 u tejkalua në korrik.

Megjithatë, ndërsa numri i aplikimeve është rritur, numri i turqve që u është dhënë azil në Gjermani ka rënë në vitet e fundit. Në vitin 2022, 27.8% ishin të suksesshëm; këtë vit ka rënë në 15%, përcjell albinfo.ch.

---