Shtetasit e Kosovës, në vendin e tretë për marrjen e shtetësisë zvicerane

Me 3356 shtetas të rinj, Kosova vjen pas Gjermanisë dhe Italisë Nga Maqedonia e Veriut janë natyralizuar 1706 veta

Sipas shifrave të fundit nga Sekretariati Shtetëror për Migracionin (SEM), rreth 40,000 njerëz kanë fituar shtetësinë zvicerane në vitin 2019, shkruan watson.ch.

Siç dihet, ekzistojnë disa mundësi për këtë, duke përfshirë natyralizimin e zakonshëm (pas 10 vitesh qëndrimi në Zvicër), natyralizimin e thjeshtuar (për bashkëshortët dhe fëmijët e shtetasve zviceranë) ose birësimin e një fëmije të mitur.

Por cili shtet përfaqësohet më shpesh në mesin e 40,000 të sapo natyralizuarve?

Gjermania qëndron bindshëm në krye, në nivel vendi por pastaj ka dallime të mëdha kantonale: kufijtë vendorë dhe ata gjuhësorë kanë një efekt të kuptueshëm në natyralizimet, transmeton albinfo.ch. Për këtë arsye, gjermanët e natyralizuar janë numri 1 në shumë kantone që flasin gjermanisht.

Në Kantonin e Gjenevës dhe në atë të Vaudit janë francezët dhe në Ticino, sigurisht, italianët.

Por ka dhe përjashtime interesante: Në kantonet Jura, Solothurn dhe Uri, italianët janë  në krye, pavarësisht ndryshimit gjuhësor në mes të këtyre tre kantoneve (Jura është kanton frankofon).

Portugezët janë në vendin e parë në Neuchâtel, Freiburg dhe Valais, përcjell albinfo.ch. Ndërsa një numër veçanërisht i madh i njerëzve nga Kosova janë natyralizuar në Kantonin e Lucernit dhe atë të Glarusit.

Në kantonet e shënuara me ngjyrë të kuqe (Lucern dhe Glarus), ksovarët zënë evndin e parë për natyralizim

Gjermania, Italia, Kosova, Portugalia dhe Franca: Janë këto pesë shtete që përfaqësojnë numrin më të madh të shtetasve të natyralizuar në të gjithë Zvicrën në vitin 2019. Ato pasohen nga: Turqia, Maqedonia e Veriut, Serbia dhe Spanja.

20 vjet më parë kjo shpërndarje ishte shumë e ndryshme – në atë kohë pothuajse çdo person i katërt i natyralizuar ishte nga Italia. Përqindja e njerëzve nga Turqia gjithashtu ka rënë ndjeshëm që nga fillimi i mijëvjeçarit. Ndërsa Kosova në atë kohë, meqë nuk njihej si shtet, përfshihej në kategorinë: “Serbia, Kosova dhe Mali i Zi”.

Kjo kategori në vitin 2000 përbënte 11.4% të të gjithë të natyralizuarve ndërsa në vitin 2019, këto tri shtete përbëjnë së bashku 11.8%. Këtu, Kosova ka pjesën dukshëm më të madhe. Me 3356 shtetas të rinj, ajo vjen pas Gjermanisë dhe Italisë, shkruan albinfo.ch. Nga Maqedonia e Veriut që është e shtata në listë, janë natyralizuar 1706 veta ndërda nga Serbia, e teta, 1364.

---