Shqiptarët nuk duhet të ndihen të kërcënuar nëse AfD-ja merr pushtetin në Gjermani

Ilustrim, Pixabay

Ish-diplomati Sylë Ukshini ka komentuar zhvillimet politike në Gjermani dhe rritjen e partisë së djathtë ekstreme Alternativa për Gjermaninë (AfD), duke theksuar se shqiptarët nuk duhet të ndihen të kërcënuar nga kjo parti, edhe nëse ajo fiton pushtetin kur mbahen zgjedhjet më 23 shkurt.

Ukshini vuri në dukje se Gjermania mbetet motori kryesor i Bashkimit Evropian, por gjithmonë ka pasur hezitim për të marrë një rol udhëheqës për shkak të së kaluarës historike

Duke analizuar ngritjen e AfD-së, Ukshini ka thënë se politikat e kancelares së dikurshme Angela Merkel për pranimin e refugjatëve pa kritere, sidomos atyre nga Lindja e Mesme, kanë krijuar shqetësime në shoqërinë gjermane, duke i dhënë AfD-së shtysë të madhe në elektorat. Megjithatë, ai nuk beson se Gjermania do të rrëshqasë në ekstrem, pasi kjo do të ishte e dëmshme për vendin.

“Shqiptarët e Kosovës nuk duhet të ndihen të kërcënuar. Ata janë të integruar në shoqërinë gjermane dhe shumë sektorë varen nga emigrantët. Prandaj, deklaratat e AfD-së për dëbimin e të gjithë emigrantëve nëse vijnë në pushtet janë kryesisht për konsum elektoral”, ka thënë ai në “Interaktiv” të KTV-së.

Në nivel ndërkombëtar, Ukshini paralajmëroi se BE-së i mungon një zë i unifikuar, veçanërisht pas daljes së Britanisë së Madhe, e cila e ka dobësuar fuqinë diplomatike dhe ushtarake të unionit. Ai sugjeroi që BE-ja duhet të fokusohet në rritjen e kapaciteteve të saj ushtarake, ashtu siç po bën SHBA-ja.

Duke komentuar mbi marrëdhëniet SHBA-Gjermani, Ukshini u shpreh se SHBA-ja ka qenë gjithmonë aleat kyç i Berlinit për çështjet e sigurisë, por tensionet filluan që në kohën e Merkelit për shkak të projekteve si Nord Stream 2. Ai gjithashtu theksoi se administrata Trump është atipike, por nuk beson se është në interesin e amerikanëve të rrezikojnë aleancën tradicionale me Evropën.

Sipas sondazheve, CDU/CSU pritet të dalë e para me rreth 30%. AfD-ja pritet të jetë e dyta me 20% e partia e kancelarit Olaf Scholz, SPD, do të jetë e treta.