Shqipëria mbyll ëndrrën për Botëror, humbet nga Polonia 2-1

Shqipëria pësoi një humbje të ngushtë 2-1 ndaj Polonisë në sfidën gjysmëfinale të play-off-it për kualifikueset e Botërorit 2026. Ndeshja u zhvillua në Varshavë dhe u karakterizua nga përpjekje të shumta të kuqezinjve për të marrë një rezultat historik, por një mbrojtje polake e fortë dhe dy golat e Levandovskit dhe Zielinskit vendosën fatin e takimit, transmeton albinfo.ch.

Kuqezinjtë arritën të kalonin të parët në avantazh në minutën e 42-të, kur Hoxha shfrytëzoi një gabim të mbrojtjes polake dhe dërgoi topin në rrjetë, duke dhënë shpresë për një rezultat të favorshëm. Pjesa e parë përfundoi me avantazhin minimal të Shqipërisë 1-0.

Në pjesën e dytë, Polonia reagoi fuqishëm. Levandovski barazoi në minutën e 63-të pas një dalje të gabuar të portierit Strakosha. Më pas, Zielinski shënoi golin vendimtar në minutën e 73-të, duke i dhënë fitoren 2-1 skuadrës vendase.

Trajneri i Shqipërisë, Silvinjo, aktivizoi disa nga lojtarët rezervë si Muçi dhe Broja në minutat e fundit, duke tentuar të rihapte ndeshjen. Megjithatë, tentativat e kuqezinjve për të barazuar rezultatin nuk sollën ndryshim në shifrat finale.

Me këtë humbje, Shqipëria nuk arriti të kalojë në finale dhe humbi mundësinë për të qenë pjesë e Botërorit 2026.