Shqipëria, Gjermania, Turqia dhe Zvicra sjellin më së shumti turistë në Kosovë

ASK: Shqipëria prin për numrin e turistëve të huaj në Kosovë

Numri i vizitorëve në hotelet e Kosovës ka shënuar rritje gjatë muajit maj 2026 krahasuar me të njëjtën periudhë të vitit të kaluar, sipas të dhënave të publikuara nga Agjencia e Statistikave të Kosovës (ASK), përcjell albinfo.ch.

Gjatë muajit maj, në hotele janë regjistruar gjithsej 69.081 vizitorë, prej të cilëve 25.026 ishin vizitorë vendorë, ndërsa 44.055 vizitorë të huaj.

ASK-ja bën të ditur se, krahasuar me majin e vitit 2025, kur ishin regjistruar 61.931 vizitorë, numri i përgjithshëm i vizitorëve është rritur me 11.5 për qind.

Po ashtu, numri i net-qëndrimeve arriti në 155.599, prej të cilave 88.957 ose 57.2 për qind u realizuan nga vizitorët e huaj, ndërsa 66.642 ose 42.8 për qind nga vizitorët vendorë.

Sipas ASK-së, numrin më të madh të vizitorëve të huaj e përbënin turistët nga Shqipëria, me 7.938 vizitorë. Pas tyre renditen vizitorët nga Gjermania, Turqia dhe Zvicra.

Institucioni i statistikave thekson se numri i vizitorëve të huaj është rritur me 18.1 për qind krahasuar me majin e vitit të kaluar, duke reflektuar një trend pozitiv të zhvillimit të turizmit në Kosovë. /Albinfo.ch

---