Shqipëria dhe Kosova forcojnë bashkëpunimin për menaxhimin e kufirit

Ambasadori i Shqipërisë në Kosovë, Petrit Malaj, ka vizituar Qendrën Kombëtare për Menaxhimin Kufitar (QKMK) në kuadër të thellimit të bashkëpunimit ndërinstitucional mes dy vendeve në fushën e menaxhimit të integruar të kufirit.

Gjatë vizitës, ai u prit nga drejtori i Departamentit për Kufi, nënkoloneli Fehmi Xhata, si dhe koordinatori i QKMK-së, Samir Krasniqi.

Në takim u diskutua vazhdimi i bashkëpunimit dhe shkëmbimit të përvojave mes institucioneve të Kosovës dhe Shqipërisë, pas vizitës së mëhershme studimore të Policisë së Shtetit shqiptar në këtë qendër gjatë muajit prill.

Përfaqësuesit e QKMK-së prezantuan kapacitetet dhe mekanizmat e Menaxhimit të Integruar të Kufirit (MIK), duke theksuar rolin e qendrës në koordinimin 24 orë në ditë të institucioneve përgjegjëse për sigurinë kufitare.

Ambasadori Malaj vlerësoi punën dhe profesionalizmin e stafit, duke e cilësuar QKMK-në si një model të avancuar bashkëpunimi institucional në rajon dhe një mekanizëm të rëndësishëm në parandalimin e veprimtarive të paligjshme.

Ai gjithashtu rikonfirmoi gatishmërinë e Shqipërisë për të vazhduar mbështetjen në projekte që forcojnë bashkëpunimin ndërkufitar.

Në fund të vizitës, delegacioni inspektoi nga afër ambientet operative të QKMK-së dhe u njoh me funksionimin e saj në praktikë.