Shqipëria

Shqipëri: Së shpejti kamerat inteligjente zëvendësojnë policët, gjobat do të vijnë me foto

E enjte, 17 Prill 2025 - 22:20 albinfo.ch

Kryeministri Edi Rama njoftoi se këtë vit do të nisë përdorimi i kamerave inteligjente për monitorimin e qarkullimit rrugor, në kuadër të programit “Smart City”. Sistemi do të vendoset fillimisht në qendrat e qarqeve dhe pranë shkollave, duke eliminuar nevojën për praninë fizike të policëve në rrugë.

Shkeljet e rregullave të qarkullimit do të identifikohen në kohë reale dhe çdo gjobë do të shoqërohet me fotografi të momentit të shkeljes, transmeton albinfo.ch.

Së bashku me gjobën, drejtuesit e mjeteve do të marrin edhe njoftim për vendin dhe kohën kur duhet të paraqiten për ta paguar atë.