Shqetëson mbipesha te fëmijët

Problemi i obezitetit (mbipeshës) te fëmijët në Zvicër vazhdon të jetë shqetësues. Sipas shënimeve më të reja të ofruara nga shërbimet shëndetësore të shkollave  nga qytetet Bazel, Bernë dhe Cyrih, çdo i shtati fëmijë parashkollor në këto qytete ka peshë më të madhe se mesatarja.

Statistika të cilën e ka publikuar sot gazeta SonntagsZeitung më tutje flet për shifra edhe më shqetësuese sa u përket fëmijëve të moshës shkollore. Në ciklin e ulët të fillores, mbipeshë ka çdo i pesti nxënës ndërsa në ciklin e lartë, madje çdo i katërti.

Dallime të vogla ka ndërmjet qyteteve të përmendura. Kështu, më së shumti fëmijë me mbipeshë jetojnë në qytetin e Bazelit e më së paku në atë të Bernës ndërkohë që fëmijët e Cyrihut janë diku në mes.

Sipas mjekut kantonal të Bazelit, dallimet në këtë pikë në mes të qyteteve të përmendura sqarohen me strukturat e ndryshme sociokulturore të popullsisë së qyteteve përkatëse.