Shoqëria civile: Korrupsioni në Kosovë të mos ndëshkohet vetëm nga ambasadat

Organizatat e shoqërisë civile, të cilat angazhohen për sundim të ligjit dhe qeverisje të mirë, e kanë mirëpritur paralajmërimin e Ambasadës Amerikane në Kosovë në lidhje me dështimet e drejtësisë kosovare kundër aferave të korrupsionit të lartë.

Ambasada e SHBA-së veçoi disa nga rastet me aferat korruptive më të mëdha, si “Pronto”, “Vizat italiane”, “Ikja nga burgu i Dubravës” dhe “Apex”, disa prej të cilave kanë marrë vendim nga gjykata, e disa të tjera janë në proces, duke paralajmëruar personat e përfshirë se nuk do të pajisen me viza amerikane, transmeton albinfo.ch.

Shoqëria civile dhe mediat në vazhdimësi po ngritin dyshime për raste korruptive, mirëpo ato dyshime të bazuara po shkojnë qoftë pa u hetuar fare, në raste të caktuara, duke u përfaqësuar në mënyrë joprofesionale në gjykatë.

“Reagimi i ambasadës duhet të na shërbejë të gjithë neve, por sidomos për ata policë, prokurorë dhe gjykatës me integritet për të ngritur zërin dhe marrë guximin për sfidën e radhës e që, përpos të gjitha problemeve të tjera, qartazi është lufta aktive kundër korrupsionit të brendshëm në sistemin e drejtësisë dhe korrupsionit të nivelit të  lartë dhe krimit të organizuar. Andaj, ne edhe një herë bëjmë thirrje që kjo shoqëri të mos privohet nga një sistem i drejtësisë që merr vendime meritore dhe të drejta”, theksohet në reagim.