Shoqata “Medvegja” në Zvicër: Duhet mobilizim urgjent për zgjedhjet serbe

Autobusët të nisen nga Prishtina dhe Fushë-Kosova

 

Zgjedhjet e jashtëzakonshme në Serbi mbahen më 17 dhjetor, ndërkaq përkitazi me këto Kryesia e Shoqatës Humanitare “Medvegja” në Zvicër ka kërkuar mobilizim urgjent, në mënyrë që të marrin pjesë në votime dhe të luftojnë për të drejtat e shqiptarëve në mënyrë institucionale, përcjell albinfo.ch.

Kryesia e Shoqatës Humanitare “Medvegja” në Zvicër ka mbajtur mbledhje të hënën, gjersa kanë përkrahur dhe ka mbështetur këto zgjedhje lokale, duke vlerësuar se ato janë shumë të rëndësishme për popullatën e mbetur shqiptare në trojet etnike të Medvegjës.

“Shoqata është në njohuri për rrethanat dhe situatën në të cilën ndodhen banorët shqiptarë në Komunën e Medvegjës, aq më tepër kur kemi një pasivizim të skajshëm të adresave të banorëve shqiptarë, me çka pamundësohet shprehja reale e fuqisë së votës prandaj bën apel për një mobilizim urgjent dhe shumë të domosdoshëm që me kushtet dhe mundësitë tona të marrim pjesë sa më shumë në këto zgjedhje, në veçanti ata që e kanë këtë të drejtë”, thuhet në njoftim.

Shoqata ka njoftuar të gjithë ata që e kanë këtë të drejtë, që janë siguruar autobusët, të cilët do të nisen nga Fushë-Kosova dhe nga stacioni në Prishtinë, më 17 dhjetor 2023, në ora 07:00.

“Vetëm të bashkuar mund t’ia dalim…”, thuhet në fund të njoftimit.

---