“Shkolla Shqipe” në Zvicër dhe LAPSH bashkohen nën një ombrellë

Me iniciativë të Ambasadës së Republikës së Shqipërisë në Bernë, në ambientet e Ambasadës së Kosovës në Bernë është firmosur marrëveshja për bashkim mes “Shkollës Shqipe” në Zvicër dhe Lidhjes së Arsimtarëve dhe Prindërve Shqiptarë “Naim Frashëri” në Zvicër.

Marrëveshja që u nënshkrua larg syve të mediave, u vlerësua si hap i madh që ka në fokus ruajtjen, mbrojtjen dhe promovimin e gjuhës shqipe, duke nisur nga mësuesit dhe nxënësit shqiptarë në Konfederatën e Zvicrës, duke premtuar një të ardhme më të ndritur për brezat e rinj.

“Së bashku, do të ofrojmë një platformë më të gjerë arsimore, duke integruar stafet mësimore dhe rritur numrin e nxënësve dhe cilësinë e mësimit”, thuhet në njoftim, transmeton albinfo.ch.

Marrëveshjen për bashkim e kanë firmosur dy drejtuesit e shkollave shqipe. Vaxhid Sjediu nga “Shkolla Shqipe” dhe Liburn Mehmetaj nga LAPSH, në prani të Ambasadorit të RSH-së, Mustafa Nano, të RKS-së, Sami Ukelli, të RMV-së, Rexhep Demiri, ministres së Arsimit të RKS-së, Arbërie Nagavci, përfaqësueseve të shkollave shqipe nga kantonet, si dhe mësueseve të shkollave shqipe. Po ashtu në mbështetje të këtij bashkimi kanë firmsour dhe tre ambasadorët.

“Ky është një ogur i mirë, pasi ky vit është shpallur nga Ministria e Arsimit dhe Sportit të Republikës së Shqipërisë si “Viti i Gjuhës Shqipe” dhe Ambasada shpreson se që nga fillimi i vitit shkollor 2024/2025 të gjithë mësimdhënësit dhe nxënësit do të fillojnë një epokë të re për arsimin shqip në Zvicër”, vazhdon njoftimi.

Lexoni po ashtu:

Bashkimi Historik i Dy Shkollave Shqipe në Zvicër

Lexoni po ashtu:

LAPSH i Cyrihut përshëndet unifikimin e mësimit shqip në Zvicër

 

---