Shkoi në pushime gjatë përmbytjeve, jep dorëheqje ministrja gjermane

Spiegel kishte kërkuar falje të dielën për pushimet familjare katër-javore menjëherë pas katastrofës së përmbytjeve në 2021.

Ministrja Anne Spiegel e Gjermanisë tha të hënën se kishte vendosur të largohej nga posti i Ministres së Familjes pas polemikave mbi vendimin e saj për të shkuar me pushime vitin e kaluar, menjëherë pas përmbytjeve shkatërruese në shtetin, ku ajo ishte në atë kohë si zyrtare e lartë.

Spiegel, një anëtare e të Gjelbërve, është ministrja e parë që dha dorëheqjen nga Qeveria federale e kancelarit Olaf Scholz, e cila përbëhet nga socialdemokratët e tij (SPD), partia ambientaliste dhe Demokratët e Lirë liberalë (FDP), transmeton Albinfo.ch.

“Sot, për shkak të presionit politik, kam vendosur të largohem nga zyra e Ministrit Federal për Çështjet Familjare”, tha Spiegel në një deklaratë.

“Unë po e bëj këtë për të shmangur dëmtimin e zyrës, e cila po përballet me sfida të mëdha politike”, theksoi tutje ajo.

Në atë kohë, ajo ishte ministre e Mjedisit në rajonin e Rheinland-Pfalz, i cili mori pjesën më të madhe të përmbytjeve më vdekjeprurëse të Gjermanisë në gjashtë dekada që vranë më shumë se 170 njerëz.

Vendimi i Spiegel për të dhënë dorëheqjen, sipas Reuters, erdhi përpara zgjedhjeve rajonale muajin e ardhshëm në North Rhine-Westphalia, shteti më i populluar i Gjermanisë, i cili gjithashtu u godit rëndë nga përmbytjet.

Javën e kaluar, ministrja e Mjedisit për North Rhine-Westphalia dha dorëheqjen pas zbulimeve se ajo kishte kaluar shumë kohë pas përmbytjes në Mallorca, përcjell tutje Albinfo.ch.

Vendimi i Spiegel për të lënë postin e saj në Qeverinë federale erdhi pavarësisht se Scholz e mbështeti atë.

Bashkëdrejtuesi i Partisë së të Gjelbërve, Omid Nouripour, u tha gazetarëve se vendimi i Spiegel ishte i drejtë.

---