Shfrytëzojnë vërshimet për kënaqësinë e tyre!

Por, ajo që për surfistët paraqet kënaqësi, për autoritetet përbën veprim me rrezik për ta dhe për të tjerët

Ndërkohë që të tjerët i shikojnë me frikë valët lumenjve që janë ngritur shumë pas shirave të ditëve të fundit, janë disa që gjithë këtë e shohin si shans për sportin e tyre. Fjala është për surfistët (lundruesit me dërrasë) të cilët janë parë të shtunën dhe të dielën duke u kënaqur në luftë me valët e lumit Thur, në kantonin Thurgau, në lindje të Zvicrës.

Shokët e tyre kanë regjistruar me kamera amatore sfidën e rrezikshme të surfistëve dhe e kanë hedhur xhirimet e tyre në rrjetin youtube, ku ato kanë ngjallur interesim të mjaft shikuesve.

Por, ajo që për surfistët e Thur-it paraqet kënaqësi, për autoritetet përbën veprim me rrezik për ta dhe për të tjerët.

Sipas një zëdhënësi të policisë së Thurgaut, të shtunën janë parë rreth 10 persona duke ushtruar sportin e tyre të rrezikshëm në valët e lumit Thur, në Bürglen.

“Ne i kemi përzënë menjëherë nga lumi, sepse kjo që bënin ata, është shumë e rrezikshme. Uji i turbullt sjell me vete edhe gurë dhe mbeturina të ndryshme dhe në rast se ato godasin ndonjë lundrues, ai mund ta humbasë vetëdijen dhe ne atëherë nuk jemi në gjendje ta ndihmojmë”.