„Shëruesi“ infekton 16 persona me HIV

Sipas padisë, personi në fjalë ka siguruar gjak nga së paku një person i infektuar me HIV dhe atë gjak pastaj ua ka injektuar viktimave

Një mësues muzike nga Berna, i prezantuar edhe si shërues, akuzohet se ka infektuar me qëllim 16 persona, duke u injektuar atyre gjak të infektuar me virus të Aids-it. Në padinë ndaj tij të cilën e ka ngritur prokuroria e përgjithshme e Bernës ai fajësohet për shkaktim të shumëfishtë të lëndimeve të rënda trupore dhe për përhapje të sëmundjeve. Shumica e viktimave të supozuara kanë qenë nxënës të mësuesit të muzikës.

Veprat për të cilat ngarkohet ai, janë kryer në vitet 2001-2005.

Padia më tutje konsideron se personi në fjalë ka siguruar gjak nga së paku një person i infektuar me HIV dhe atë gjak pastaj ua ka injektuar viktimave. Disa prej tyre ai i ka narkotizuar me një pije para se t`i infektonte. Ndërsa disa të tjerë i ka shtyrë, me pretekste të ndryshme që të pranojnë injeksionin.

Personi i akuzuar udhëhiqte pa leje pune një ordinancë të akupunkturës në Bernë. I pari që kishte shfaqur dyshimin ndaj “shëruesit” kishte qenë një i sëmurë nga aids-i, i cili ishte kontrolluar në insel spital të Bernës në vitin 2004. Me atë rast ai ishte shprehur se infektimin e kishte marrë nga trajtimi me akupunkturë që kishte bërë te “shëruesi” në fjalë. Pas tij ishin paraqitur edhe persona të tjerë me akuza të njëjta.