SHBA-ja heq sanksionet ndaj Millorad Dodikut dhe bashkëpunëtorëve të tij

Keystone EPA/NIDAL SALJIC

Qeveria e Shteteve të Bashkuara të Amerikës ka hequr sanksionet ndaj ish-liderit të serbëve të Bosnjës, Millorad Dodik, si dhe dhjetëra individëve e kompanive të lidhura me të. Vendimi u bë publik të mërkurën dhe përfshin edhe aleatët e tij politikë, anëtarë të familjes dhe subjekte të lidhura ekonomikisht me ta.

Sipas Departamentit Amerikan të Thesarit, që e konfirmoi këtë hap, sanksionet kishin ndaluar më parë çdo transaksion financiar me Dodikun dhe të gjithë të sanksionuarit e tjerë. Ndërkohë, Departamenti i Shtetit nuk iu përgjigj pyetjeve për arsyet konkrete që çuan në këtë vendim.

Ky zhvillim vjen pas disa muajsh trazirash politike në Bosnjë e Hercegovinë. Më 18 tetor, Asambleja Kombëtare e Republikës Sërpska anuloi ligjet që synonin të ndalonin punën e institucioneve gjyqësore dhe policore shtetërore në territorin e entitetit serb. Po atë ditë, Ana Trishiq-Babiq u konfirmua si presidente në detyrë e Republikës Sërpska, duke zëvendësuar përfundimisht Dodikun, i cili kishte humbur mandatin pas një vendimi gjykate që e dënoi për mosrespektim të urdhrave të përfaqësuesit të lartë ndërkombëtar në Bosnjë, Christian Schmidt.

Në një deklaratë, Departamenti Amerikan i Shtetit përshëndeti vendimin e Asamblesë për të tërhequr ligjet separatiste dhe e cilësoi këtë si “rezultat të përpjekjeve të udhëhequra nga SHBA për të qetësuar krizën politike në Bosnjë”.