SFH kundër kthimit të refugjatëve në Hungari

SFH kërkon po ashtu që Zvicra të vendosë në lidhje me kërkesat për azil të refugjatëve të cilët në Zvicër kanë ardhur përmes Hungarisë

Keystone

Organizata zvicerane që mbron të drejtat e refugjatëve “Flüchtlingshilfe” (SFH) u ka apeluar autoriteteve të Zvicrës që të mos i kthejnë më në Hungari refugjatët që dëbohen nga Zvicra. Në këtë mënyrë organizata në fjalë ka reaguar ndaj vendimit të Parlamentit të Hungarisë për izolimin e refugjatëve, shkruan srf.ch

Siç është raportuar dje, Parlamenti Hungarez ka votuar të martën me një shumicë dërmuese për internimin e refugjatëve. Ata do të mbahen në “zona transiti” që duhet të jenë në afërsi të kufijve, prej nga nuk do të mund të dalin derisa të përfundojë procedura e tyre e azilit.

SFH kërkon po ashtu që Zvicra të vendosë në lidhje me kërkesat për azil të refugjatëve të cilët në Zvicër kanë ardhur përmes Hungarisë, transmeton albinfo.ch. Ndërsa dihet se Marrëveshja e Dublinit parasheh që vendi i parë, nënshkrues i kësaj marrëveshjeje, në të cilin refugjati ka bërë kërkesën, duhet të jetë edhe përgjegjës për të vendosur për ose kundër strehimit të tij. Për këtë arsye Zvicra i kthen refugjatët në “vendet e para”.

Sipas SFH Zvicra gjatë vitit të kaluar ka kthyer në Hungari 65 azilkërkues ndërsa në vitin 2015, 94 sish.