Sa e pinë duhanin zviceranët?

Sipas Zyrës Federale të Statistikave (FSO), çdo vit në Zvicër vdesin para kohe 9500 njerëz si pasojë e pirjes së duhanit, që është e barabartë me 26 persona në ditë. Me gati 2 milionë duhanpirës, konsumimi i duhanit është një nga problemet më të mëdha të shëndetit në Zvicër, transmeton albinfo.ch.

Në fakt, nëntori është caktuar në Zvicër si një “muaj pa duhan”, ndaj është një kohë e mirë për ta lënë duhanin njëherë e përgjithmonë.

Fushata kombëtare në internet, e promovuar nga Fondi për Parandalimin e Duhanit, synon “të ofrojë një mjet për të ndihmuar shumë njerëz që dëshirojnë të çlirohen nga cigaret”.

 

Cila është mosha minimale për blerjen e produkteve të duhanit?

Ashtu si me shumë gjëra në Zvicër, mosha minimale për blerjen e produkteve të duhanit ndryshon sipas kantonit dhe zakonisht është 16 ose 18 vjeç.

Që nga 1 qershori 2023, kantonet e mëposhtme nuk do të lejojnë askënd nën moshën 16 vjeç të blejë produkte duhani: Aargau, Appenzell Ausserrhoden, Glarus, Graubünden, St. Gallen, Uri, Lucerne dhe Cyrih, transmeton tutje albinfo.ch.

Kantonet e Bernës, Basel-City, Basel-Country, Fribourg, Gjenevë, Jura, Neuchâtel, Nidwalden, Obwalden, Schaffhausen, Solothurn, Thurgau, Ticino, Vaud, Valais dhe Zug kanë vendosur moshën minimale për blerjen e produkteve të duhanit në 18 vjeç. vjet.

Ndërkohë, kantonet Appenzell Innerrhoden dhe Schwyz nuk kanë vendosur asnjë limit moshe minimale për blerjen e produkteve të duhanit brenda kufijve të tyre.

 

 

Cilat janë rregullat për cigaret elektronike?

Referuar Zyrës Federale të Shëndetit Publik (FOPH), cigaret elektronike aktualisht bien në objektin e Ligjit të Ushqimit derisa Ligji për Produktet e Duhanit të hyjë në fuqi në mesin e vitit 2024.

Ligji për Produktet e Duhanit jo vetëm që do të specifikojë se çfarë lloj paralajmërimi grafik duhet të përdoret në paketat e cigareve elektronike, por gjithashtu do të ndalojë shitjen e cigareve elektronike për këdo nën moshën 18 vjeç.

Kantonet për të mos lejuar shitjen ose dorëzimin e cigareve elektronike për moshat nën 18 vjeç janë Berna, Basel-City , Basel-Country, Fribourg, Gjenevë, Jura, Neuchâtel, Obwalden, Thurgau, Ticino dhe Valais.

 

 

Sa njerëz pinë duhan në Zvicër?

Në vitin 2022 – të dhënat më aktuale, 24 për qind e popullsisë mbi 15 vjeç pinin duhan në Zvicër. Për burrat ishte 27 përqind (18.3 përqind e të cilëve ishin duhanpirës të përditshëm) dhe për gratë ishte 21 përqind (14 përqind duhanpirës ditor).

Nga ata të moshës 15 deri në 24 vjeç, 26 për qind pinin duhan.

61.8 për qind e duhanpirësve meshkuj në Zvicër raportuan se do të donin ta linin këtë ves, ndërsa 58.8 për qind e femrave deklaruan të njëjtën gjë.

 

Sa njerëz pinë cigare elektronike?

Në vitin 2022, 3 për qind e popullsisë zvicerane përdorte cigare elektronike të paktën një herë në muaj. Tek adoleshentët ndërmjet 15 dhe 24 vjeç, kjo prevalencë ishte 5.7 për qind – një trend që është në rritje.

 

A ka vende në Zvicër ku nuk mund të pini duhan?

Sipas BAG, restorantet, kafenetë, baret dhe diskotekat janë hapësira të aksesueshme nga publiku ku pirja e duhanit përgjithësisht është e ndaluar në Zvicër.

Por mund të ketë përjashtime.

Ndonjëherë, restorantet do të krijojnë dhoma për duhan që mund të zënë deri në një të tretën e sipërfaqes totale të dhomave të shërbimit.

Restorantet e vogla me një sipërfaqe maksimale prej 80 metrash katrorë mund të aplikojnë në kanton për një leje si objekt duhanpirës (me kusht që të mos ketë rregullore kantonale që e ndalojnë këtë).

 

Sa i kushton ekonomisë zvicerane përdorimi i duhanit?

Konsumi i duhanit nga popullata zvicerane po i kushton ekonomisë së Zvicrës rreth 3.9 miliardë franga zvicerane në vit, nga të cilat 3 miliardë franga zvicerane përdoren për trajtim mjekësor dhe 0.9 miliardë franga zvicerane për humbje të të ardhurave.

Sëmundjet jo të transmetueshme që shkaktohen nga konsumimi i duhanit çojnë në përdorim mbi mesataren e shërbimeve mjekësore në Zvicër si dhe në ulje të cilësisë së jetës apo edhe në pamundësi për të punuar. Kjo do të thotë se këto sëmundje kontribuojnë në rritjen e kostove të sigurimeve shoqërore.

---