Riho Terras: E ardhmja e Kosovës është në BE, por nevojiten reforma

Eurodeputeti tha se gjatë vizitës në Prishtinë zhvilloi takime me drejtues institucionalë për të diskutuar zhvillimet politike dhe procesin e integrimit evropian.

Raportuesi për Kosovën në Parlamentin Evropian, Riho Terras, ka deklaruar se e ardhmja e Kosovës është në Bashkimin Evropian, duke theksuar se rruga drejt anëtarësimit kërkon zbatimin e reformave, përcjell albinfo.ch.

Përmes një postimi në platformën X, pas takimeve të zhvilluara gjatë vizitës së tij në Prishtinë, Terras bëri të ditur se ka diskutuar me përfaqësues të institucioneve të Kosovës për zhvillimet politike dhe procesin e zgjerimit të Bashkimit Evropian.

“Përshëndetje nga Prishtina! Këtë mëngjes u takova me Albulena Haxhiun, Glauk Konjufcën dhe Bedri Hamzën. Diskutuam për politikën e Kosovës dhe zgjerimin e Bashkimit Evropian. E ardhmja e Kosovës qëndron në BE, por anëtarësimi kërkon reforma. Po punojmë për këtë”, shkroi Terras në platformën X./Albinfo.ch

---