Partia Demokratike ka rikthyer kontrollin mbi Kongresin amerikan në zgjedhjet afatmesme, duke i shkaktuar një goditje të rëndë politike presidentit Donald Trump. Ky rezultat mund t’ia kufizojë kompetencat Trumpit gjatë pjesës së mbetur të mandatit të tij të dytë.
Sipas rezultateve ende paraprake, demokratët kanë fituar të paktën 225 nga 435 ulëset në Dhomën e Përfaqësuesve. Pritet që, deri në përfundimin e numërimit të votave, numri i tyre të arrijë në 260 ulëse.
Demokratët kanë rikthyer gjithashtu kontrollin mbi Senatin, ku në zgjedhje ishin 35 nga gjithsej 100 ulëset. Ata arritën të fitojnë ulëse të mbajtura më parë nga republikanët në shtatë shtete: Karolinën e Jugut, Karolinën e Veriut, Teksas, Ajova, Ohajo, Kanzas dhe Mejn. Sipas rezultateve paraprake, demokratët kanë siguruar gjithsej 54 ulëse në Senat.
Me një ton pajtues, Donald Trump vlerësoi se demokratët kishin “bërë një punë të mirë”. Presidenti amerikan deklaroi se do t’i pranonte rezultatet e zgjedhjeve, por pa marrë përgjegjësi për humbjen e partisë së tij.
Pas këtij rezultati, republikanët i kanë bërë thirrje presidentit Trump të ndryshojë strategjinë politike. Aleatët e tij dhe strategët e Partisë Republikane i kanë kërkuar të riorganizojë administratën, të vendosë më shumë disiplinë dhe të rishikojë politikat që, sipas tyre, kontribuuan në humbjen zgjedhore.
Këto zgjedhje, me rëndësi të veçantë për skenën politike amerikane, u mbajtën dy vjet pas zgjedhjeve presidenciale, të cilat i fitoi Donald Trump.
Qytetarët amerikanë u thirrën të votojnë për të 435 ulëset në Dhomën e Përfaqësuesve, si dhe për një të tretën e ulëseve në Senat. Para zgjedhjeve, të dyja dhomat e Kongresit kontrolloheshin nga Partia Republikane.
