“Renault” do të vazhdojë të funksionojë normalisht

Ministri francez i Financave ka thënë se udhëheqja e re e përkohshme e “Renault”-it do ta sigurojë funksionimin efikas të prodhuesit të automjeteve, pas arrestimit të drejtorit të saj, Carlos Ghosn, në Japoni. 

Ai u arrestua me pretendimet për keqpërdorim të aseteve në “Nissan”, ku po ashtu, është president. “Kjo udhëheqësi është e fortë dhe garanton funksionimin e mirë të kompanisë Renault, që është gjëja më e rëndësishme për të cilën ne jemi të lidhur thellësisht”, tha ministri Bruno Le Maire, shkruan Albinfo.ch

Ai shtoi se i kërkoi Nissan-it të jepte “të gjitha faktet” lidhur me çështjen kundër Ghosn-it dhe se aktualisht Franca nuk ka “asnjë provë që justifikon akuzat”. Bordi drejtues i “Renault”-it njoftoi se numri dy në kompani, Thierry Bollore, do ta plotësonte përkohësisht vendin e Ghosn-it. Qeveritë japoneze dhe franceze konfirmuan mbështetjen e tyre për aleancën Renault-Nissan-Mitsubishi, liderët e industrisë me 10.6 milionë automjete të shitura në vitin 2017.