Rama thotë se është i gatshëm të japë përgjegjësi për listat e veteranëve

Komandanti i Forcës së Sigurisë së Kosovës, Rrahman Rama, ka thënë se problemi me listat e veteranëve po e dëmton imazhin e Kosovës dhe atë të UÇK-së. Por, ai ka kërkuar që të mos përzihet politika dhe kjo çështje t’i lihet në dorë drejtësisë.

Rama ishte komandant i Zonës Operative të Shalës, zonë për të cilën thotë se është i gatshëm të japë sqarime dhe përgjegjësi, në çdo kohë që është e nevojshme.

Sipas tij, duhet të dalë në dritë çdo gjë si për veteranët e vërtetë, ashtu edhe për ata që pretendohet se e kanë keqpërdorur. Por, komandanti i Forcës në një intervistë për kosovapressin ka deklaruar se nuk e kupton se me çfarë përgjegjësie morale dikush mund të gëzojë një status që nuk i takon.