Qeveria: Nuk ka skenar emergjent të azilit në Zvicër

Zvicra është fare larg nga një krizë në fushë të azilit. Kështu ka deklaruar Qeveria Federale e Zvicrës duke iu referuar kritikave dhe panikut që pjesërisht ka shpërthyer për rrezikun që gjoja e kërcënon shtetin helvetik nga fluksi i refugjatëve. Në këtë kontekst Zvicra nuk është në situatën për të aktivizuar klauzolën e gjendjes emergjente, u është përgjigjur qeveria pyetjeve të ndryshme të ardhura nga parlamenti.

Në të njëjtën kohë Këshilli Federal sqaron se do të merren masa për të strehuar refugjatët tjerë që do të vijnë. Për vitin 2015 parashikohet që ky numër të shkojë deri në 29 mijë sish.

Këshilli Federal i ka rekomanduar parlamentit që të hedhë poshtë “moratoriumin e menjëhershëm të azilit”, të kërkuar nga SVP/UDC.