Qeveria e Kosovës ratifikon marrëveshjen për pensionet me Zvicrën

Qeveria e Kosovës ka miratuar dy projektligjet për ratifikim të marrëveshjeve për sigurimet sociale në mes të Republikës së Kosovës dhe Zvicrës dhe me Belgjikën.

Me këto marrëveshje, qytetarët do të mund të gëzojnë të drejtën e pensionit kontributpagues, pensioneve familjare dhe invalidore të punës.

«Me këto marrëveshje, qytetarëve kosovarë do t’u mundësohet që pas arritjes së moshës së pensionimit në këto dy vende, të kenë të drejtë që pensionet e përmendura t’i marrin në Kosovë. Gjithashtu ata do të kenë të drejtën e bashkimit të periudhave të kontributeve pensionale», thuhet në një njoftim të Qeverisë së Kosovës, përcjell albinfo.ch.

Marrëveshja për Sigurime Sociale në mes të Republikës së Kosovës dhe Konfederatës së Zvicrës ishte nënshkruar në muajin qershor. Marrëvshja e tillë hap rrugë realizimit të së drejtave të qytetarët të të dyja shteteve në fushën e sigurimeve sociale.

Qeveria e Kosovës ka miratuar të martën edhe Projektligjin për ratifikim të marrëveshjes ndërmjet Qeverisë së Republikës së Kosovës dhe Qeverisë së Zvicrës për programin e mbështetjes për ujësjellës dhe kanalizim në zonat rurale, Faza VI.

Programi do të kontribuojë në krijimin e sistemeve të reja më të favorshme për zhvillimin e shërbimeve të ujit në zonat rurale të Kosovës.