Qeveria e Kosovës dërgon produkte ushqimore në veri të vendit

Foto: Endrit Shala (Fb)

Gjatë ditës së sotme, mediat në Kosovë raportuan se janë mbyllur shitoret në veri të Kosovës, përcjell albinfo.ch. Sipas raportimeve, thuhet se mbyllja e shitoreve erdhi si shkak i taksës 100% që Kosova ia ka vendosur Serbisë muaj më parë. 

Lidhur me këtë, sot veriun e vendit e ka vizituar edhe ministri i Tregtisë dhe Industrisë, Endrit Shala.

Përmes një videoje në Facebook, Shala ka bërë të ditur se në bashkëpunim me disa biznese vendore, kanë dërguar produkte esenciale ushqimore për qytetarët në këtë pjesë të vendit.

“Sot, Qeveria e Republikës së Kosovës, Ministria e Tregtisë dhe Industrisë, në bashkëpunim me Ministrinë e Punëve të Brendshme dhe institucionet e tjera të Republikës së Kosovës, e po ashtu në përkrahje dhe bashkëpunim të bizneseve tona që merren me shitje të produkteve ushqimore në Republikën e Kosovës, kemi organizuar një veprim, me të cilin iu mundësojmë qytetarëve të Kosovës në pjesën e Mitrovicës së veriut dhe Leposaviq e Zveçan që të kenë mundësi të furnizohen me produkte ushqimore”, tha Shala para mediave, përcjell albinfo.ch.

Po ashtu, Shala në Facebook ka shkruar se bizneset kosovare do t’u qëndrojnë pranë qytetarëve të vendit, duke u ofruar produktet esenciale ushqimore.

“Ne do të vazhdojmë të shtrijmë sovranitetin e vendit në çdo pjesë të 10887 km katrorë. Asnjë qytetari të Republikës së Kosovës nuk do t’ i mungojë asnjë produkt, tregu ynë është i hapur dhe ofron të gjitha produktet e nevojshme për një jetë të dinjitetshme”, ka thënë Shala.

https://www.facebook.com/OfficialEndritShala/videos/421292015264574/