Punëtorët e azilit dyshohen për abuzim seksual me azilkërkues

Hetimet që do të zhvillohen pritet të qartësojnë nëse në rastet e veprimeve seksuale bëhet fjalë për shfrytëzim të gjendjes së rëndë të azilkërkuesve

Pesë veta nga personeli i sigurisë dhe tre nëpunës të shërbimit për migracion në kantonin e Neushatelit po dyshohen se duke shfrytëzuar gjendjen e rëndë të azilkërkuesve kanë bërë veprime seksuale me ta.  Prokuroria e përgjithshme e Neushatelit ka iniciuar hetimet ndaj 8 personave me dyshimin për abuzim seksual në qendrën e azilit Boudry.

Të dyshuarit janë marrë në pyetje në mes të 7 dhe 14 shkurtit, bëhet e ditur nga organet kompetente. Hetimet që do të zhvillohen pritet të qartësojnë nëse në rastet e veprimeve seksuale bëhet fjalë për shfrytëzim të gjendjes së rëndë të azilkërkuesve. Autoritetet e kantonit të Neushatelit theksojnë se për 8 personat në fjalë vlen prezumimi i pafajësisë deri sa gjykimi të mos konstatojë ndryshe.  

Dy nga tre nëpunësit e zyrës për migracion të kantonit tashmë janë pezulluar nga puna. Po ashtu që të gjithë personat e dyshuar nga personeli i sigurisë janë zëvendësuar menjëherë nga njerëz të tjerë.