Protesta e studentëve në Beograd përshkallëzoi në përplasje, policia përdori gaz lotsjellës

EPA/ANDREJ CUKIC

Policia serbe ka përdorur gaz lotsjellës kundër protestuesve të shtunën në mbrëmje pranë Presidencës së Serbisë, pas përfundimit të protestës studentore që kërkojnë zgjedhje të parakohshme dhe përgjegjësi institucionale për tragjedinë në Novi Sad, shkruan Radio Evropa e Lirë, transmeton albinfo.ch.

Protesta e nisur në sheshin Sllavija, e cila u zhvillua në mënyrë paqësore dhe u shpall e përfunduar zyrtarisht, mori një kthesë të dhunshme kur një grup burrash të maskuar u përlesh me forcat e policisë në qendër të kryeqytetit. Protestuesit hodhën shishe dhe sende të tjera drejt policisë, duke përshkallëzuar situatën, ndërsa forcat e rendit reaguan me gaz lotsjellës për të shpërndarë turmën. Në vendngjarje janë parë edhe njësi të xhandarmërisë.

Ministri i Brendshëm i Serbisë, Ivica Daçiq, e ka dënuar ashpër dhunën dhe ka paralajmëruar masa të ashpra për rikthimin e rendit. “Të gjithë ata që kanë sulmuar pjesëtarët e policisë do të ndiqen penalisht,” deklaroi ai.

Paralelisht me protestën studentore, në Parkun e Pionierëve u mbajt edhe një tubim mbështetës për presidentin serb, Aleksandar Vuçiq, organizuar nga grupe studentore pro-qeveritare. Vetë Vuçiq publikoi një video nga ky tubim, duke e cilësuar si fitore përkrahjen ndaj tij. “Studentët fituan, bllokuesit humbën. Krenar me këta të rinj,” shkroi ai në Instagram, duke minimizuar madhësinë e protestës së kundërshtarëve dhe duke deklaruar se kishte më pak pjesëmarrës se në protestën masive të 15 marsit, transmeton albinfo.ch.

Studentët protestues kanë paralajmëruar se nuk do të ndalen pa përmbushjen e dy kërkesave kryesore: dërgimin nga ana e Qeverisë të një propozimi për shpërndarjen e Parlamentit dhe shpalljen e zgjedhjeve të reja, si dhe ndërprerjen e tubimeve të organizuara nga mbështetësit e qeverisë, të cilët i cilësojnë si provokime.

Ata i mbajnë përgjegjëse institucionet për shembjen e strehës në stacionin hekurudhor të Novi Sadit në nëntor të vitit të kaluar, që mori jetën e 16 personave. Studentët theksojnë se protesta e tyre ka qenë gjithmonë paqësore dhe refuzojnë çdo lidhje me veprimet e dhunshme.

Në ditët e fundit, autoritetet kanë arrestuar gjashtë persona për dyshime për përgatitje të “përmbysjes së dhunshme të rendit kushtetues”. Organizatorët e protestës i kanë quajtur këto akuza si përpjekje për t’i frikësuar dhe delegjitimuar protestuesit, transmeton albinfo.ch.