Prokuroria e Prishtinës, çerdhe e krimit të organizuar

Avokatin e Popullit në detyrë, Sami Kurteshi, thotë se sistemi në drejtësi ka dështuar, ndërsa Prokuroria Themelore e Prishtinës është çerdhe e krimit të organizuar

Sistemi i drejtësisë në Kosovë në përgjithësi është i dështuar, ndërsa Prokuroria Themelore në Prishtinë dhe kryetari i saj janë çerdhe e krimit të organizuar. Kështu konsideron Avokatin e Popullit në detyrë, Sami Kurteshi, i cili mendon se si pasojë e dështimit në drejtësi ka ardhur Gjykata Speciale.

“Sistemi gjyqësor i Republikës së Kosovës përfshi gjykatat, prokurorinë, policinë ka dështuar. Jo vetëm se ka dështuar, por është bërë çerdhe e krimit të organizuar, sidomos prokuroria. Unë po e them Prokuroria Themelore e Prishtinës është çerdhe e krimit të organizuar”, deklaroi Avokati i Popullit.

Sipas Kurteshit, kjo prokurori bashkë me kryetarin e saj, ka dështuar.

“Këtë e kanë parë të gjithë çka u bë tash si besojnë gjykimit tonë, drejtësisë tonë. Nuk besojnë se ne mund të bëjmë drejtësi shoqërore edhe drejtësi institucionale edhe tash po na e bartin jashtë. Kjo është tragjike madje e kanë suspenduar pjesërisht edhe Gjykatën Kushtetuese”, theksoi Kurteshi.

Në një intervistë për KP, Kurteshi flet edhe për mos zgjedhjen e Avokatit të ri të Popullit, “ku në bazë të rrethanave, po shihet se partitë politike po bëjnë gara se cila do ta ketë njeriun e vet në krye të këtij institucioni”.

Derisa, flet për ballafaqimin me Gjykatën Kushtetuese, Kurteshi thotë se kurrë asnjëherë nuk ka pasur asgjë personale me kryetarin e saj Enver Hasani, as gjyqtarët tjerë, por e ka thënë atë që është e drejtë, falsifikimin e dokumenteve që ka bërë Kushtetuesja dhe kryetari i saj.

Duke folur për themelimin e Gjykatës Speciale, ai thotë se kjo do ta cenojë sovranitetin e shtetit.

“Kjo është grushti më i madh që e ka marrë Republika e Kosovës pas lufte. Ggrushti më i madh. Unë i dëgjoj flasin kështu, kanë synimet e veta, kanë pikëpamjet e veta, kanë politikanët, analistët, shoqëria civile, kuvendi, Qeveria gjithkush do të thotë: bën kështu. Por, çështja është gjyqësori… Bazën e sovranitetit të brendshëm shtetëror e përbën gjyqësori, nuk e bënë ekzekutivi, as legjislativi nuk merret me sovranitetin”, deklaroi ai.

Legjislativi, sipas tij, garanton të drejtën, ekzekutivi ekzekuton vendimet që duhet t’i marrë gjyqësori, po thelbin e mbrojtjes e bënë gjyqësori, “e nëse ta merr atë të drejtë të ndarjes së drejtësisë ta merr pjesën thelbore të sovranitetit”.

“Le ta interpretojnë si të donë. Unë e di ka këtu interpretime të ndryshme. Kjo është marrje, jo bartje, është marrje e sovranitetit të Republikës së Kosovës në mënyrë të njëanshme”, tha Kurteshi.