Prezantohet projekti “Tungjatjeta”, metodë e re dygjuhëshe për mësimin e gjuhës shqipe në diasporë

Në kuadër të Seminarit XIX Mbarëkombëtar të Mësuesve të Gjuhës Shqipe dhe të Kulturës Shqiptare në Diasporë dhe në Mërgatë u prezantua projekti “Tungjatjeta”, një metodë e re dygjuhëshe për mësimin e gjuhës shqipe, e hartuar për fëmijët shqiptarë që rriten në mjedise dygjuhëshe dhe shumëgjuhëshe.

Projekti u prezantua nga Dr. Mimoza Hysa, drejtoreshë e Qendrës së Botimeve për Diasporën, e cila foli për procesin institucional që çoi në zhvillimin e kësaj nisme. Ndërkaq, Prof. Dr. Aljula Jubani prezantoi qasjen didaktike dhe risitë metodologjike të metodës.

“Tungjatjeta” është iniciuar nga Qendra e Botimeve për Diasporën dhe është zhvilluar në bashkëpunim me Departamentin e Gjuhës Shqipe në Fakultetin e Historisë dhe të Filologjisë të Universitetit të Tiranës, si dhe me mësuesit e gjuhës shqipe në diasporë.

Autorë të metodës janë Prof. Dr. Aljula Jubani, Prof. Dr. Linda Meniku dhe Dr. Adriana Bejko. Në botimin shqip–anglisht, Dr. Adriana Bejko ka realizuar edhe përkthimin e tekstit në gjuhën angleze.

Versioni i parë i metodës është botuar në variantin shqip–anglisht (niveli A1), ndërsa në fazat e ardhshme projekti synon zgjerimin edhe në gjuhë të tjera, në përputhje me nevojat e komuniteteve shqiptare në diasporë.

Sipas prezantuesve, “Tungjatjeta” përfaqëson një model bashkëkohor për mësimin e shqipes si gjuhë e trashëgimisë, duke synuar t’u përgjigjet profileve gjuhësore dhe nevojave të brezave të rinj të shqiptarëve që jetojnë jashtë vendit.