Prangosen tre kontrabandistë të emigrantëve

Këta persona i përkasin regjionit të Prizrenit, ndërsa sipas Policisë, ka dëshmi të bazuara se ata janë marrë në vazhdimësi me kontrabandim të emigrantëve

Policia e Kosovës ka arrestuar të hënën tre person që i përkitnin një grup trafikantësh me emigrantë, ndërsa gjatë baritjes së shtëpive të tyre, janë konfiskuar disa pasaporta, letërnjoftime dhe dokumentet të tjera që janë shfrytëzuar për trafikimin e kosovarëve nëpër vendet e Bashkimit Evropian.

Këta persona i përkasin regjionit të Prizrenit, ndërsa sipas Policisë, ka dëshmi të bazuara se ata janë marrë në vazhdimësi me këtë veprimtari ilegale.

Këtë aksion, siç deklaruan përfaqësuesit e Policisë së Kosovës e ka udhëhequr Sektori i Hetimeve i Departamentit të Policisë Kufitare, ndërsa nga të arrestuarit dy janë shqiptarë, ndërsa njëri është i komunitetit goran. Të arrestuar janë: B. A  i lindur më 1970; R. D  i lindur më 1963 dhe K. C  i lindur më 1958.

“Operacioni policor ka filluar duke kryer bastisje në pesë lokacione të ndryshme të regjionit të Prizrenit. Gjatë bastisjes janë gjetur dhe konfiskuar në cilësi të provave mijëra dokumente të ndryshme, si: pasaporta, letërnjoftime, certifikata të lindjes, të shtetësisë, forma të ndryshme të aplikimeve për nxjerrjen e dokumenteve (serbe, bullgare, shqiptare) barna të ndryshme që dyshohet se janë të kontrabanduara, një revole, municione të gjuetisë, një thikë etj”, thuhet në raportin e policisë.

Personat e dyshuar, tashmë të arrestuar nga policia, dyshohet se në mënyrë të organizuar dhe në bashkëpunim, me qëllim të përfitimit material, përmes rrugëve ilegale apo me dokumente të falsifikuara, kanë dërguar apo kanë tentuar të dërgojnë shtetasit kosovarë drejt vendeve të Bashkimit Evropian, ku shumë prej tyre janë viktimizuar, qoftë fizikisht qoftë materialisht.

“Të gjitha veprimet policore, lidhur me operacionin dhe bastisjen dhe arrestimeve e të dyshuarve është kryer me urdhër të Gjykatës Themelore në Prizren, respektivisht Prokurorisë Speciale”, thuhet në njoftimin e policisë.