Posta Zvicerane paralajmëron për një mashtrim të ri, qytetarët të kenë kujdes nga fletënjoftimet me kod QR

Mashtruesit po lënë në kutitë postare njoftime që duken si zyrtare, por kodi QR i dërgon përdoruesit në faqe të rreme për pagesa.

Posta Zvicerane ka lëshuar një paralajmërim për një skemë të re mashtrimi që po qarkullon në kantonin e Cyrihut, duke u bërë thirrje qytetarëve të tregojnë kujdes ndaj njoftimeve të rreme për dërgesa, përcjell albinfo.ch.

Sipas Postës, mashtrimi realizohet përmes fletënjoftimeve që lihen në kutitë postare dhe që ngjajnë pothuajse identikisht me njoftimet zyrtare të Postës Zvicerane. Në to përfshihet një kod QR, i cili, pasi skanohet, e dërgon përdoruesin në një faqe interneti të rreme.

Në këtë faqe, viktimës i kërkohet të kryejë një pagesë paraprake për një dërgesë të supozuar.

“Kushdo që skanon kodin QR bie menjëherë në kurthin e mashtruesve”, paralajmëroi një zëdhënës i Postës Zvicerane, duke shtuar se kërkesat e papritura për pagesa duhet të ngjallin gjithmonë dyshime.

Autoritetet këshillojnë qytetarët që të mos skanojnë kode QR nga njoftime të dyshimta dhe të kontrollojnë gjithmonë nëse adresa e internetit është zyrtare e Postës Zvicerane. Nëse kodi QR të çon në një adresë që nuk i përket Postës, njoftimi duhet të hidhet menjëherë.

---