Politikani belg kërkon “një shqiptar për të vrarë pedofilen Michel Martin”!

Verstrepen: “Pa shaka, ne mund ta gjejmë një shqiptar dhe ta paguajmë atë për ta hequr qafe Michelle Martin"

Lirimi nga burgu i Michelle Martin, gruas së dënuar me 16 vjet burg si bashkëfajtore e Marc Durtroux në krimin e rëndë të pedofilisë, ka ngjallur reagime të bujshme në opinionin belg. Ajo është liruar 14 vite para se ta kryente dënimin e plotë që i ishte shqiptuar, 30 vjet burg.

Shumica e dënojnë këtë lirim të parakohshëm, duke pasur parasysh se rasti Dutroux ka qenë ndër krimet më të rënda që kishte ndodhur në Belgjikë. Pedofili Dutroux kishte abuzuar seksualisht 6 vajza në moshat 8 deri 19 vjeçare, 4 nga të cilat kishin vdekur nën dhunën e tij dhe të bashkëshortes së tij Michelle Martin.

Ndër reagimet e ndryshme  lidhur me lirimin e Martin, ka bërë bujë një prononcim i politikanit të djathtë flaman Jurgen Verstrepen për paskrupullsinë e tij. “Pa shaka, nëse i mbledhim bashkë të gjitha reagimet, ne mund ta gjejmë një shqiptar dhe ta paguajmë atë për ta hequr qafe Michelle Martin (…) Kandidatë?”.

Këtë konstatim dhe këtë pyetje e ka bërë Verstrepen në twitter dhe në facebook. Më vonë ai i ka shtuar kësaj edhe fjalinë në vijim: “Po ta mendosh më hollë, shqiptarët janë bërë tepër të shtrenjtë – një i droguar do ta bënte këtë (vrasjen) për më pak para”. 

Politikanë të ndryshëm të partive tjera e kanë gjykuar komentin e kolegut të tyre si të papranueshëm dhe të papërgjegjshëm.