Policia gjen tre të vdekur në një garazh në Uerkheim, Aargau

Është ende e paqartë gjinia dhe mosha e të ndjerëve. Mbetet gjithashtu e paqartë nëse ata jetonin në shtëpinë ku janë gjetur ose jo

Një operacion i madh policor është zhvilluar të enjten (sot) në Uerkheim të Kantonit Aargau. Tre persona janë gjetur të vdekur në një garazh, transmeton albinfo.ch. Policia ende nuk ka dhënë asnjë informacion për shkakun e vdekjes.

Megjithatë, sipas saj, në asnjë moment të operacionit të përmendur nuk ka pasur rrezik për popullatën. Janë mobilizuar edhe njësitet e zjarrfikësve. shkruan sda.ch. Nuk është inicuar ndjekje personash lidhur me rastin dhe kjo sugjeron se nuk kemi të bëjmë me deliktin e vrasjes. Nuk përjashtohet mundësia e vetëvrasjes ndonëse policia nuk e pohon as mohon këtë.

Policia ka marrë njoftimin përkatës në orën 13:30, pas të cilit dy patrulla nga policia rajonale dhe zjarrfikësit kanë shkuar në vendngjarje, ka thënë zëdhënësi i policisë.

Deri më tani është ende e paqartë gjinia dhe mosha e të ndjerëve, përcjell albinfo.ch. Mbetet gjithashtu e paqartë nëse personat e gjetur jetonin në shtëpinë, në garazhin e të cilit janë gjetur ose jo.

Për momentin, policia kriminale po punon për zbardhjen e shkakut të vdekjes dhe rrethanave që sollën vdekjen e tre personave.

---