Pilotin e zë gjumi mbi timon

Një kopilot holandez nuk i kishte rezistuar dot lodhjes dhe kishte bërë “një sy gjumë” për disa minuta të mirë derisa po ngiste aeroplanin përplot udhëtarë

Edhe pilotët janë përfundimisht njerëz! Këtë e ka dëshmuar edhe një kopilot holandez i cili nuk i kishte rezistuar dot lodhjes dhe kishte bërë “një sy gjumë” për disa minuta të mirë derisa po ngiste aeroplanin përplot udhëtarë. Ai, derisa po fluturonin në hapësirën ajrore të Greqisë, po e zëvendësonte pilotin kryesor i cili kishte shkuar në toalet. Kur ishte kthyer pas pak minutave, dhe kishte dshur të ulej në ulësen e pilotimit, ky i fundit nuk mundi të hapte derën pasi që e kishte zënë kolegu i tij gjumash.

Thirrjet në telefonin intern mbetën të pasuksesshme pasi që kopiloti nuk dëgjonte, aq thellë ishte “fundosur në botën e ëndrrave”. Kështu, për disa minuta aeroplani po fluturonte pa pilot, ka thënë zëdhënësi i shoqatës së pilotëve Jörg Handwerg. Vetëm me përpjekje të përbashkëta të stafit të aeroplanit, mundi të hapej më në fund dera e kabinës.

Shoqata e pilotëve e ka vlerësuar këtë akt si shkelje të rëndë dhe e ka denoncuar rastin. “Pilotët që flenë në vendin e punës konsiderohen si rrezik për sigurinë e fluturimit”, ka thënë Handwerg. Oraret e pilotëve duhet të përpilohen ashtu që ata të mos mbingarkohen me punë, gjë që mjerisht aktualisht është duke ndodhur, ka shtuar ai.