Peticion për trajtim më të mirë të të sëmurëve me Hepatit

Personat në Zvicër që sëmuren nga Hepatiti-C do të duhej të kenë të drejtë që pa kufizime të trajtohen me medikamentin e ri efikas por të shtrenjtë.

Të përkujtojmë se një terapi me këtë medikament kushton deri në 60 mijë franga. Prandaj, trajtimin e të sëmurëve pa kufizime po e kërkojnë rreth 1300 veta që kanë nënshkrua një peticion për këtë.

Peticionistët kërkojnë nga industria farmaceutike të zbresë çmimet e medikamenteve të nevojshme për kurimin nga sëmundja e përmendur.

Deri tash, sigurimi bazë i sigurimeve shëndetësore në Zvicër paguante medikamentet në fjalë vetëm në rastet kur mëlçia e pacientëve kishte pësuar dëme të mëdha nga virusi.

Ndërkaq dje Zyra Federale për Shëndetësi ka vendosur që ta zgjerojë për rreth 900 persona rrethin e pacientëve që përfitojnë nga trajtimi me kushte më të favorshme.