Pesë shtete të BE-së kërkojnë pezullim të përkohshëm të avancimit të Malit të Zi drejt BE-së

Procesi i integrimit të Malit të Zi në Bashkimin Evropian po përballet me pengesa të reja, pasi pesë vende anëtare kanë kërkuar një pauzë në hapat e mëtejshëm të negociatave.

Holanda është në mesin e shteteve që kërkojnë më shumë kohë për shqyrtimin e përmbushjes së kritereve nga Podgorica. Kësaj kërkese i janë bashkuar edhe Kroacia, Estonia, Lituania dhe Letonia. Sipas mediave malazeze, këto vende kërkojnë një vlerësim më të detajuar të reformave dhe zbatimit të standardeve përpara se të merren vendime të reja në nivel të BE-së.

Burime të cituara nga media “Dan” në Bruksel bëjnë të ditur se aktualisht nuk ka një afat të qartë për avancimin drejt mbylljes së kapitujve negociues apo për caktimin e një Konference Ndërqeveritare.

Diskutimet mes vendeve anëtare kanë nxjerrë në pah dallime në qëndrime, ndërsa diplomatët theksojnë se për vazhdimin e procesit nevojitet pajtimi i të gjitha shteteve.

Për këtë arsye, pritet që takimet e ardhshme të përqendrohen në përpjekjet për arritjen e një marrëveshjeje mes vendeve anëtare.

Një gjë duket e qartë: këtë muaj nuk pritet të ketë mbyllje të kapitujve të rinj në kuadër të Këshillit të BE-së, ndonëse një zhvillim i tillë ishte parashikuar më herët.

Një zyrtar evropian ka deklaruar se disa prej kapitujve janë veçanërisht teknikë dhe kërkojnë konsultime të gjera të brendshme në secilin shtet anëtar. Sipas tij, ekziston vullnet për të avancuar procesin, por koha për të përfunduar procedurat po bëhet gjithnjë e më e kufizuar.

Gjatë korrikut u zhvilluan katër konferenca ndërqeveritare, ku u diskutua si hapja e grupeve negociuese për Ukrainën dhe Moldavinë, ashtu edhe mbyllja e kapitujve për Shqipërinë dhe Malin e Zi.

Mali i Zi deri tani ka mbyllur 18 nga 33 kapitujt e negociatave me Bashkimin Evropian. Konferenca e fundit Ndërqeveritare ku u mbyllën kapituj negociues u zhvillua në korrik.

Një prej pengesave lidhet edhe me qëndrimin e Kroacisë. Ky shtet ka dhënë miratimin për pothuajse të gjithë kapitujt, por ka rezerva për Kapitullin 14, që lidhet me politikën e transportit. Ndërkohë, Kapitulli 31, që përfshin politikën e jashtme, sigurinë dhe mbrojtjen, mbetet i bllokuar prej dy vitesh.

Konferenca e radhës mund të zhvillohet në tetor

Komisioni Evropian aktualisht ka në shqyrtim nëntë pozicione negociuese. Ministrja malazeze për Çështjet Evropiane, Maida Gorçeviq, ka deklaruar se pozicionet për pesë kapitujt e mbetur pritet të dërgohen deri në fund të vitit.

Në Podgoricë vazhdon të mbizotërojë pritshmëria se vendi mund ta përfundojë procesin e negociatave me BE-në deri në fund të vitit. Megjithatë, zhvillimet e fundit në qarqet diplomatike evropiane tregojnë se koha për mbylljen e kapitujve të tjerë mbetet e pasigurt.

Skenari më optimist për momentin është zhvillimi i një Konference Ndërqeveritare në mesin e muajit të ardhshëm, në Luksemburg.

---