Për dy vjet ikën mbi 200 mjekë nga Kosova

150 mjekë të tjerë pritet të largohen vetëm këtë vit

Mësohet se në dy vjetët e fundit rreth 220 mjekë janë larguar nga Kosova, duke kërkuar punë në Gjermani dhe vende të tjera të Bashkimit Evropian (BE), përcjell albinfo.ch.

Nga ana tjetër, 150 mjekë të tjerë pritet të largohen vetëm këtë vit.

Përfaqësues nga Oda e Mjekëve të Kosovës thonë se ky trend i rritjes po thellon krizën për staf shëndetësor. Sipas tyre, arsyet e largimit të mjekëve nga Kosova kanë të bëjnë me kushtet e këqija të punës, problemet me specializim dhe pagat e ulëta.

Paga bruto (e pataksuar) e mjekëve në Kosovë është 610 euro, derisa në Gjermani, ata paguhen deri në 4 mijë euro. /Albinfo.ch

---