PDK kërkon ndaljen e dhunës ndaj protestuesve dhe miratimin e ligjit për UÇK-në

Partia Demokratike e Kosovës (PDK) ka reaguar ndaj zhvillimeve gjatë protestave të qytetarëve që kërkojnë miratimin e një ligji për mbrojtjen e vlerave të luftës së UÇK-së.

Në një deklaratë, PDK ka dënuar përdorimin e forcës ndaj protestuesve dhe ka kërkuar nga institucionet shtetërore që të ndalin, siç thuhet, çdo veprim joproporcional ndaj qytetarëve që ushtrojnë të drejtën e protestës.

Sipas PDK-së, kërkesa e protestuesve lidhet me miratimin e ligjit që synon mbrojtjen e UÇK-së dhe përmbylljen e procesit ligjor. Partia opozitare pretendon se nuk ekziston pengesë ligjore për miratimin e tij dhe se këtë e ka konfirmuar edhe Qeveria në opinionin e saj.

PDK ka deklaruar se protestuesit, përfshirë familjarë të dëshmorëve, veteranë dhe invalidë të luftës, po kërkojnë një përgjigje institucionale për një çështje që e konsiderojnë të rëndësishme për vendin.

Në reagim, PDK ka kritikuar edhe mënyrën e menaxhimit të protestave nga institucionet e sigurisë, duke pretenduar se përdorimi i forcës ndaj një proteste që, sipas saj, ka qenë e qetë për disa ditë, është i papërshtatshëm.

Partia Demokratike e Kosovës ka kërkuar nga të gjitha grupet parlamentare dhe deputetët që të ndërmarrin hapa për përmbylljen e procesit të miratimit të ligjit.

PDK ka bërë thirrje gjithashtu që e drejta e qytetarëve për protestë të respektohet dhe që institucionet të japin përgjigje për kërkesat e tyre përmes procedurave dhe vendimmarrjes institucionale.