PDK drejtuar Deharit: Seanca konstituive të thirret nesër

Foto: Kuvendi i Kosoves

Partia Demokratike e Kosovës i është drejtuar me kërkesë të re kryesuesit të seancës konstituive, Avni Deharit, duke kërkuar vazhdimin e seancës për 18 gusht, nga ora 11:00.

Sekretarja e Përgjithshme e PDK-së dhe deputetja e kësaj partie, Vlora Çitaku përmes kërkesës ka deklaruar se moskonstituimi i Kuvendit brenda afatit të përcaktuar ka krijuar një situatë që, sipas saj, është në kundërshtim me Kushtetutën dhe me veprimet e Gjykatës Kushtetuese.

Tutje, sipas saj vazhdimi i procedurave pa tejkaluar këtë situatë do të përbënte shkelje të mëtejshme të Rregullores së Kuvendit dhe Kushtetutës.

“Duke pasur parasysh se, sipas jurisprudencës së Gjykatës Kushtetuese, pavarësisht tejkalimit të afatit kushtetues, Kuvendi duhet të konstituohet, shkelje e afatit nuk e shuan detyrimin për konstituimin e tij”, thuhet në kërkesë, transmeton albinfo.ch.

Çitaku i është drejtuar Deharit duke i thënë se, në cilësinë e kryesuesit të seancës konstituive ka për detyrë të shmangë çdo shkelje të mëtejshme dhe të mundësojë vazhdimin e procesit të konstituimit të Kuvendit teksa vlerëson se roli i kryesuesit është që të ruajë kushtetutshmërinë e procesit dhe se tejkalimi i kompetencave politike do të mund të ndikonte në vazhdimin e procesit të konstituimit.

Në kërkesë thuhet gjithashtu se vlerësimet dhe negociatat politike duhet të zhvillohen brenda kornizës kushtetuese dhe se të gjitha partitë janë të obliguara ta respektojnë atë.