Pasuria që trashëgojnë zviceranët, më e madhe se që mendohej

Vlera e pasurisë së trashëguar në vitin 2011 ka qenë 61 miliardë franga. Ndërsa për vitin 2015 llogaritet të jetë 76 miliardë franga

Asnjëherë deri më tash në Zvicër nuk është trashëguar pasuri më shumë se viteve të fundit. Kështu, sipas një studimi të realizuar nga Universiteti i Lozanës dhe ai i Cyrihut, vlera e pasurisë së trashëguar në vitin 2011 në nivel të Zvicrës ka qenë 61 miliardë franga.

Ndërsa një përllogaritje e bërë për vitin 2015 flet madje për 76 miliardë franga.

Nga ana tjetër Këshilli Federal dhe Komiteti për mbështetjen e iniciativës “Të taksohen trashëgimitë milionëshe” deri tash kanë menduar se bëhet fjalë për vetëm 40 miliardë franga.

Me shifrat e reja, edhe fitimet në rast të votimit të iniciativës do të jenë dukshëm më të mëdha, shkruan srf.ch. Kështu, veç tjerash propozohet që me këtë fitim të shtuar të përforcohet financimi i sigurimit pensional dhe të trashëgimisë (AHV/AVS).

Në vitin 2011 pasuritë e trashëguara kanë përbërë 13 për qind të të gjitha të ardhurave në Zvicër ose më shumë se dyfishi i vitit 1975.